Tarjei gjorde hat-trick

Tarjei Valdersnes (16) herja med godt vaksne stopparar frå Kvernbit for 6. div. laget søndag og gav seg ikkje før han hadde sett tre ballar i nota. Radøy 2 vann kampen 6-1.

Radøy hadde stort sett god kontroll i denne kampen utan å få til det aller beste spelet. Men glimtvis fungerte det svært bra. Sander Lunde skåra første målet etter 11 minutt. Tarjei la på til 2-0 i det 21. minutt og Eskil Marøy auka til 3-0 få minutt etter. Då såg det veldig trygt ut for radværingane. Men Kvernbit reduserte ti minutt før pause og kampen var langt frå avgjort.

Men så var det denne 16-åringen då. Han putta to raske mål kort tid etter kvilen og dermed var det heile avgjort. Eskil Marøy auka på til 6-1 kvarteret før slutt og dermed vann Radøy 6-1 i solskinet på ei strøken grasbane på Bø.

Radøy ligg no på 4. plass berre to poeng bak tabelltoar Masfjord/Gulen som ligg an til opprykk. Radøy møter dei på bortebane alt neste laurdag - og då får Radøy 2 for alvor vist kva som bur i dette laget.

Fototekst: Unge Tarjei Valdersnes gjorde hat-trick for 6. divisjonslaget på Bø-graset søndag.

Teks og bilde Jon Halstein